बलिउड अभिनेता शाहरुख खानले अब आफ्नो जीवनलाई पुस्तकमार्फत सार्वजनिक गर्ने भएका छन् । ‘द अफिसिएल ओपस अफ शाहरुख खान’ नामक यो पुस्तक आगामी वर्ष प्रकाशित हुनेछ । पुस्तकमा अधिकांश उनका तस्विर र डायरीका अंशहरू समेटिनेछन् ।
आफ्नो पुस्तकका बारे जानकारी दिँदै शाहरुखले भनेका छन् –‘म विगत धेरैवर्षदेखि नियमित डायरी लेखिरहेको छु । हरेकवर्ष मसँग केही यस्ता स्मरणीय क्षण छन् जसलाई म सबैको सामु राख्न चाहन्छु । जब म एक्लै हुन्छु वा कहिलेकाहिँ निराशा आउँछ, तब म कलमको सहारा लिएर केही लेख्न थाल्छु ।’ पुस्तकले आफ्नो जीवनका विभिन्न आयामहरूबारे जानकारी दिने शाहरुखले बताएका छन् ।
शाहरुखको यो पुस्तक ३७ किलो तौल र ८ सय पेजको हुनेछ । यस्तैगरि आफ्नो महत्वाकाङ्क्षी सिनेमा ‘रा.वान’बाट अपेक्षित सफलता हात पार्न नसकेपछि अब झनै मिहनेतको सिनेमाको अर्को सिक्वेल बनाउने घोषणा गरिसकेका उनले फिल्म समिक्षकबाट पनि आफूले सहयोग नपाएको गुनासो गरेका छन् । उनले समिक्षकलाई फिल्म निर्माता बनेर हेर्न सुझाव दिए ।
