नब्बे लाख नेपाली फेसबुकमा अटाएका छन् । जसमध्ये दुई तिहाइ संख्या त तन्नेरी मात्रै छन् । न्यूयोर्कको वालस्ट्रिट, मध्यपूर्वको कलर रिभोलुसन हुँदै काठमाण्डूको नेपाल युनाइट्सजस्ता हलचल बनाउन इन्टरनेटको यो जालोको भूमिका अद्धितिय छँदै छ । तर, हामी यहाँ नेपाली समाजका बाँकी पाटोको कुरा गरिरहेका छौं । जहाँ प्रेमदेखि क्राइमसम्म फेसबुकले आफूलाई स्थापित गरिरहेको छ । यी कुरालाई सिल्भर स्क्रिनमा उतार्न नेपाली सिनेमा 'फेसबुक बन्दैछ ।
'फेसबुक' खिच्न कलाकार, प्राविधिक र मेकरसहितको टोली प्रशान्त क्षेत्रीय राष्ट्र सिंगापुर उड्दैछ । 'फेसबुक' खिच्ने यो जम्बो टोली मंसिर एक गते त्यसतर्फ जाँदैछ । निर्माता सुनिलकुमार थापा, निर्देशक सुरज सुब्बा, अभिनेत्री (निर्मात्री पनि) झरना थापा, सिनेम्याट्रोग्राफर संजय लामासहित एघार जनाको टोली सिंगापुर लाग्नेछ । टोलीमा हिरो पनि सहभागि हुनेछन् तर उनको नाम उल्लेख छैन । यही सिनेमाबाट उनी चलचित्र अभिनय थाल्दैछन् । सिंगापुरमा एकसाता सुटिङ हुनेछ ।
निर्माता थापाले गीत र नौवटा दृश्य सिक्वेन्स खिच्ने बताए । सन्दर्भअनुसार, चलचित्रका नायक गैरआवसिय नेपाल (एनआरएन) हुन्छन् र 'फेसबुक'मार्फत नेपालमा रहेकी हिरोइनसँग उनी प्रेममा पर्छन् । ‘प्रेममात्र होइन, फेसबुक राम्रा र नराम्रा दुवै पक्षलाई उठान गर्नेछौं’ थापाले मेरोसिनेमासँग भने, ‘फेसबुकबाट हुने अपराध पनि चित्रण गरिनेछ ।’ आफ्नो सिनेमाले मुलुकमा साइवर कानुन बनाउन दबाब दिने आशा थापाले लिएका छन् । चलचित्रमा महानायक राजेश हमाल प्रहरी अधिकृतको केमियो भूमिकामा छन् । पहिलोपटक प्रविधिमा आधारित नेपाली सिनेमा बन्न लागेको हो ।
